प्रादेशिक स्वास्थ्य आपूर्ति व्यवस्थापन केन्द्र

गण्डकी प्रदेश सरकार, स्वास्थ्य मन्त्रालय मातहत रहेको यस प्रादेशिक स्वास्थ्य आपूर्ति व्यवस्थापन केन्द्र, गण्डकी प्रदेशको आधिकारिक वेबसाइटमा यहाँहरुलाई हार्दिक स्वागत गर्दछु ।

गण्डकी प्रदेशका नागरिकहरुको स्वास्थ्य सुरक्षालाई उच्च प्राथमिकतामा राखी आवश्यक एवं गुणस्तरीय औषधी, खोप तथा स्वास्थ्य सामाग्रीहरुको निरन्तर एवं निर्वाध सुनिश्चित गर्न यो केन्द्र सदैव कटिबद्ध रहँदै आएको छ । स्वास्थ्य नीति र मन्त्रालयको रणनीतिक मार्गदर्शन अनुरुप हामी प्रदेशभर एक सबल स्वास्थ्य आपूर्ति प्रणालीको संस्थागत विकास गर्ने दीर्घकालीन अभियानमा केन्द्रित छौं ।

औषधीजन्य मालसामानहरुको नियमित उपलब्धता बिना स्वास्थ्य सेवाका सम्पूर्ण प्रयासहरु निरर्थक हुने तथ्यलाई आत्मसाथ गर्दै यस केन्द्रले अत्यावश्यक औषधी, खोप, मातृशिशु स्वास्थ्य सामाग्री एवं जीवनरक्षक उपकरणहरुको खरिद, वैज्ञानिक भण्डारण र सुरक्षित वितरण प्रणालीलाई आफ्नो कार्यको केन्द्रविन्दुमा राखेको छ । स्वीकृत वार्षिक कार्यक्रम र खरिद योजना अनुसार प्रदेश मातहतका अस्पतालहरुको सुदृढीकरणका कार्यहरु अघि बढाइएका छन् ।

स्वास्थ्य सामाग्रीको आपूर्ति सुनिश्चित गर्नका लागि हामीले वैज्ञानिक तबरबाट परिमाण प्रक्षेपण तथा निर्धारण र वार्षिक खरिद योजना गर्ने गरेका छौं । विशेष गरी नसर्ने रोग तथा अन्य नियमित माग हुने औषधीहरुको वर्षभरि निर्वाध आपूर्ति सुनिश्चितताका लागि भविष्यमा बहुवर्षीय संरचनात्मक सम्झौताको नवीन अवधारणलाई कार्यान्वयमा लैजाने हाम्रो दीर्घकालीन लक्ष्य रहेको छ । सार्वजनिक खरिद ऐन तथा नियमावलीका नवीनतम संशोधनहरु (१६ औं संशोधनसहित) को पूर्ण पालना गर्दै शतप्रतिशत विद्युतीय खरिद प्रणाली, सार्वजनिक खरिदमा स्वेदेशी मालसामानलाई प्राथमिकता दिने राष्ट्रिय नीति र पारदर्शी मूल्याङ्कन विधि मार्फत खरिद कार्यलाई पूर्ण विश्वसनीय र मितव्ययी बनाउन हामी क्रियाशील छौं ।

स्वास्थ्य मन्त्रालयको प्रत्यक्ष नेतृत्वमा यस केन्द्रले संघीय स्वास्थ्य सेवा विभाग, प्रदेश जनस्वास्थ्य प्रयोगशाला, ११ वटै जिल्लाका स्वास्थ्य कार्यालयहरु, प्रादेशिक अस्पतालहरु, स्थानीय सरकारहरु र अन्य राष्ट्रिय अन्तराष्ट्रिय सरोकारवाला संघसंस्थाहरु बीच मजबुत समन्वय स्थापित गरेको छ । गण्डकी प्रदेशका सबै नेपाली नागरिकहरु, विशेष गरी महिला, बालबालिका, ज्येष्ठ नागरिक, अति विकट ग्रामीण भेगमा बसोबास गर्ने तथा सीमान्तकृत समुदायसम्म गुणस्तरीय स्वास्थ्य सामग्रीको न्यायोचित पहुँच र समतामूलक वितरण प्रणाली सुनिश्चित गर्न हामी सदैव प्रतिबद्ध छौं ।

हाम्रो यस आधिकारिक वेबसाइट स्वास्थ्य आपूर्ति र खरिद प्रणालीसँग सम्बन्धित राष्ट्रिय तथा अन्तराष्ट्रिय स्तरमा सरोकारवाला निकायहरु, उद्यमीहरु, र आम नागरिकका लागि सूचनाको प्रमुख र भरपर्दो सेतु बन्नेछ भन्ने कुरामा म पूर्ण विश्वस्त छु । यस वेबसाइटले केन्द्रका खरिद प्रक्रिया, औषधिको मौज्दात विवरण र विविध गतिविधिहरुको बारेमा सम्बन्धित सबैलाई पारदर्शी रुपमा सूचित गर्नेछ । वेबसाइटलाई अझ बढी उपयोगी, सान्दर्भिक र प्रभावकारी बनाउन यहाँको अमूल्य सल्लाह, रचनाच्मक प्रतिक्रिया र सुझावहरुको सदैव अपेक्षा गर्दै हार्दिक स्वागत गर्दछु ।

धन्यवाद !

खिम बहादुर खड्का
 कार्यालय प्रमुख

khimkhadka2012@gmail.com